KUT personality of the year mi 2 kiang ah kipia

November 2, 2007

IMPHAL NOV 1: State Level Kut Committee, Manipur saina in tuni’n 1st Bn Manipur Rifle ground ah KUT zatna hun ah, kumdang kihih ngeilou tukum a patkhiak thak, Kut Personality of the Year kichi Social Worker minih Pu ST. Susa Anal leh Pu Chanthoi Chongam Aimol te kiang ah Rs 10,000 tuak piak in om hi. Tuni Kut zatna a khuallian a pang Governor in agenna ah, Manipur a Chin-Kuki-Mizo-Zomi ten Kut azatna un muanna, ki-unauna leh kituahna hontut adeihthu leng taklang a, KUT Committee phungvuhna ding in Rs. 50,000/- pia hi. Zinglam hun ah Cultural troupe tuamtuam in namlam lahna leh lasasiam tuamtuam apat zaila sakna om in, hun zohna nitaklam dak 3 in kipahthu genna Pu Holkhomang Haokip Ex-MP in nei hi.

Hun nihna nitaklam dak 4.30 ah khuallian leh Guest of honour dingin, Manipur Chief Minister O. Ibobi Singh leh N. Biren Singh, Minister IFCD/YAS hiding ua, Functional President in Phungzathang Tonsing Minister Power/Sc&Tecg/H&SC pang uhi. Hiai hun ah Chief Guest in KUT Committee panpihna ding in Rs. 1 lakhs pia a, Functional President Pu T. Phungzathang inleng KUT Committee phungvuhna ding in Rs. 50,000/- pia a, tuabanah, Edn. Minister Pu L. Jayenta Kumar leh RD & PR Minister Pu Allaudin Khan ten leng Rs. 5000/- tuak pia uh hi’n thutut kingah hi.


Mibangloute panpihna ding in sum tamtak pai gige

November 2, 2007

Ministry of Social Justice and Empowerment a Secretary Dr. Veena Chattroy in tuni a agendan in, North Eastern region puahna ding toh kisai in Social Justice and Empowerment nuai leh DoNER ban ah NEC nuai ah sum tamtaktak om sek a. zatbei zohlouh ahihdan gen in, NE puahna dia ngaihdan tuamtuam neite’n Ministry ah sung pahpah ding in leng hasuan hi.

Tuni in Meghalaya khopi Shillong ah One Day Regional Seminar on Disability Issues kichi om ah, Dr Chattroy khuallian in va pang hi. Dr Chattroy in agennna ah, mibangloute toh kisai a panpihna hawmkhiakna toh kisai in Manipur leh Assam in nna hoih sep mahmah uh ahihdan gen in, North Eastern region a mibangloute panpihna ding in kum teng in sum crore tamtak paisek ahi chi hi. Dr Chattroy in agenbehna ah, Dindayal Rehabilitation scheme tungtawn in maban ah, kumteng in Rs.200 crore pai gige ta ding ahihdan leng puang hi.

Dr Chattroy in thugenna aneihna ah, India gam pumpi ah District 167 te’n mibangloute adia hamphatna tuamtuam paite mumal ngaihlou in, tanglou sek uh a, North east apan District tamtak tel ahihdan gen in, makaite leh official te fellouh ziak ahi chikawm in, proposal gina pia hile uh, tuabang om lou ding ahihdan gen in, District chih adia sum pai ahihdan leng gen hi. Union Government in mibangloute toh kisai a awareness campaign bawlna ding in Rs.70 crore sanction bawl a, himahleh, Assam state chauh in tuabang program sembu ching ahi chi in, North Eastern state leh Central Government kal ah communication gap liantak om hi’n Dr Chattroy in gen hi. North Eastern state sung ah pianken a mibanglou tamtak om a, tuabanah, upa nung leh piching nung a damlouhna ziak leh accident ziak a lungsim buai leh zawngkhal tamtak om hi’n thusuak in gen beh hi.


Power Minister in School Building hong

September 10, 2007

Phalna bei a Electric late cut sak hiding- Power Minister

Mata khua a Vungzagen Government High School building Room 8 SPA nuai a MTDC in a bawl zohsiang ahihtoh kiton in tuni’n hiai school building Power Minister Pu T. Phungzathang in sun dak 12.40 in Chief Guest hikawm in hong khia hi.

Hiai High School bel State Teacher Awardee K. Lalbiakthuami Headmistress hina nuai ah naktak a puahphat thak hi a tulel in student 500 val hiai school ah kai uhi. Headmistress in a thugenna hunah Room leh Furniture kidaihlouh ziak a tukum bul inleng naupang tamtak admission bawltheilou uh ahihdan gen in gam ittu mai hilou a gam it taktak Minister Pu Phungzathang Tonsing angvanna ziak a hichibang building nei thei uh ahihdan gen a teaching staff te’n Chief Guest, Guest of Honour leh Functional President te kipahna thilpiak piak pia uhi.

Functional President hihna toh uap Mr. Joseph Lalrothang, ZEO/CCpur in athugenna hun ah Minister thilhihthei mipite poimohna theisiam i neih ziak ua hichibang Building thak honkhiat ding om ahihdan gen kawm in Vungzagen High School a teacher-te kipiakzohna thupi a sakdan gen hi. Koimunpeuh ah school standard leh khosung standard kibang gige ahihdan leh sum-le-pai hauh chankanna hilou in siamsinna pen changkanna ahihdan gen hi. Siamsinna a masawnlou a gam khangtou omlou ahihdan leh siamsinna ngaipoimoh a siamsinna innte khosung mipite’n neitu hihna toh kep-le-jun poimoh ahihdan gen hi. Naupangte private school leh Govt. School a kaite nu-le-pate’n ngaihsakdan kibanglou pen poilua ahihdan gen in Govt.school a kaite leng Private school a kaite i ngaihsak/awlmoh tuk in awlmoh leng miphalah tuanlou uh ahihdan gen hi. Guest of Honour hihna toh uap Mr. C. Hangsing, Addl. Director of Education (Hills) in a thugenna hun ah Headmistress K. Lalbiakthuami kipumpiakna thupisa mahmah ahihdan gen in State in tukum a Teacher 7 pahtawina apiakte lak a khat ahihleng a phu/deserved ahihdan gen in Education Department in minsiatna a tuahbanah semtu tamtak in lohmuhna lel a zang a ginatak a kailou a a omlai ua hiai school a semtute gin-om leh chitak ahihna uah phatthuai asakthu gen hi.

Chief Guest Pu Phungzathang Tonsing Power Minister in athugenna hun ah School teacher tamtak mahni sepna mun/khua leng phangeilou a omlai ua Vungzagen HS Headmistress K. Lalbiakthuami bel school building deih a kap ahihna ah kipumpiakzou leh thupi sa mahmah ahihdan gen in State award a dong leng dongtaak mah ahihdan gen hi. Minister in Vungzagen High school student-te kiang ah Private school a kaiteng a siam hivek tuanlou huphulh huai uh hituanlou, a maute’n leng lehkha naktak a a simnak uhleh phalah tuanlou a asiampen hithei zomah uh ahihdan gen in lai hoihtak a sim ding in hasuan hi. School hoih a minthang khenkhatte a sinsaktute siamna sanziak hizolou in sinsaktute kipumpiak ziak ahihdan gen hi. Vungzagen High School in apoimoh uh a nget uh Teacher piak bek ding leh Furniture piak beh ding pen C. Hangsing leh Joseph Lalrothang in mohpo ding uh ahihdan leh Type Writer leh Cyclostyle bel tunung sawtlou a aman (minister in ) peding a School zotna lampi bawlding ahih leh NREGS tungtawn a bawl ding dan VA Chairman in ngaihtuah ding ahihdan gen hi.

Power Minister in agenbehna ah tulel a SPF Government puk theimai dia khenkhat in agen pen uh zuau ahihdan gen a huchimai a pukselou ding ahihdan gen hi. Electric toh kisai Power Minister in agenna ah State ah Transformer kining ching stock hiding a tamtak leng tukha sung ahongtung ding ahihdan gen a transformer kisia a omleh kintaktak a a thak thuahtheihta ding a, himahleh fee bat a neih uhleh bel abat teng uh a piakzoh chiang ua a thak thuahsak hipan ding uh hi’n gen hi. Phalna bei a mei late sutkhiatsak vek hiding a, fee don toh kisai leng NGO te khut ah 5% commission loh dia piakkhiat hiding ahihdan gen hi. Tulel in State in electric fee bat Rs.32 Crores vel om a huai lakah department tuamtuamte bat kigawm in Rs. 18 Crores vel phazou hi. Department teng inleng October 2007 sung a abatteng uh apiakkhit/ditsiang kei uhleh a plan sum chiat ua pan cutsak hiding ahihdan gen hi.


Bike in phukha

September 10, 2007

Ms. Lhingi (15) D/o. Sawnkam of S. Kotlian tuni sunma dak 11:00 vel in Torbung khua ah Bike (Pulsar) khat in phukha in a a veilam mittung a bawk banah a khuuktegeel leh a veilam khengawn keh in Lamka Damdawi Inn ah etkol in omlel hi.


Bunglon khua ah Seminar om ding

April 19, 2007

Bunglon khua ah zingchiang (April 19) in ni khat daihding Organic Farming toh kisai seminar om ding a, huai ah official tamtak kihel ding uh hi’n thutut kingah hi. Hiai seminar ahihleh, Agriculture Department te saina nuai ah neih hiding hi.


Bike in phukha in liam

April 6, 2007

Master Pauminthang (9) S/o. (L) Suonkhogin of Gelmuol tuni sunnung dak 2 vel in Phailain Don Bosco pialna bul a Bike in phukha in a a biang veilam pang leh a bil nung lak keh in, Lamka Damdawi Inn ah etkol in omlel hi.


Moreh Bazar kaite ading in patauhna

April 6, 2007

Tuzingkal dak 9 vel in Moreh Gate No 2 ah thauging om a, huai in bazaar kai mipite naktak in su patau hi. Phaijang Helpawl te hiding a gintak pawlkhat in Moreh gate No.2 Namphalong Bazar lutna bul ah thau nih vei kap ua, huai zoh in Myanmar gamsung mah ah kihemkhe nawn uhi. Gate No.2 gate ngak a om AR te’n thau kaptute delhzui ngal mah le uh matkhiak bangmah thu zak hilou a, vaite khat vawkha uh hi’n kigen hi. Helpawlte’n army te vauna dan a akap uh hidan in leng thusuak in gen hi.


Follow

Get every new post delivered to your Inbox.