MNF tung ah muanzohlouhna pawlut: Opp pawl vuallel

“Thudik gum a sih kuapeuh in I ngap chiat ding uh ahi” ~ Lalduhoma MLA

Mizoram Government a Opposition party Zoram Nationalist Party MLA Lalduhoma in Sintawpni in Assembly Speaker kiang ah lehkha pelut in MNF Government muanhuailou ahihdan taklatna nei in, himahleh, tuni in Innpi in genkhopna nei ua, huai ah ZNP pawl vuallel dimdem uh hi’n kigen hi. Lalduhoma in tuni in Innpi ah Mizo National Front (MNF) government demna naktak a bawl in, helpawlte ziak a MNF Government ding hamham ahihdan uangtak in gen a, MNF in huaiding in sum le paitamtak seng hidanin ngohna bawl hi. Lalduhoma in agenzelna ah, thudik a puankhiak ziak a sihding lauhet lou ahihdan gen a, mipite hoihna ding ahihnak leh kuapeuh si dia kiman ding in hasuan a, huaipen Mizoram dinmun ahi chi hi.

Mizoram Home minister Tawnluia in Bangladesh helpawl Shanti Bahani toh kihouna nei in, September 17, 2006 a by election om ah, MNF pawl thagum in chingsak hi’n MLA pu in ngohna bawl zom a, Home minister in Shanti Bahani te kiang ah thau leh sum a kilawm huntawk pia a, huai dungzui in election result ah kilang mai ahi chi hi. MLA Lalduhoma in thu sautak gen in a genzom zelna ah, Home minister in Shanti Bahani Comander in Chief Mukto kimuhpihna nei in, Khawzawl khua a 2nd IR battalion headquarter ah September 20, 2006 ah pilot a, huai ah leng Government Gypsy khat zangsak in, VIP light khat leng Gypsy tung ah koihsak lai hidanin gen hi. IRB 2nd Bn Headquarters apan Home Minister in Russian-made AK 47 rifles 4, Czech-made 9 mm pistol 4, rocket launcher cell 2 leh a poimoh moh pia hidan in genbeh a, Aizawl a Chakma House apan nna tamtak sepkhiak a om hidani MLA pu in ngohna MNF tung ah bawl zaak hi. Lalduhoma in agenzel na ah, February 7 2007 in Chakma helpawlte khut ah Home Minister in AK 47 rifle 1 penawn a, 1st IR battalion headquarters Mualvum ah February 21 in 303 rifles 2 leh sten gun pe nawn hidanin gen a, 3rd Mizoram Armed Police battalion headquarters Aizawl apan thautang hunkhop leng Chakma helpawl khut ah lut hidan in gen hi.

Khamtheih haaltum

Northern CCpur Youth Club Federation (NCYCF) in apaisa March 31, 2007 a Bijang area a mi 13 apan khamtheih No.4 leh SP tang amatte uh tuni zing dak 8:30 in Tuibuang KIC Hall kiang ah haaltum uhi. NCYCF in tuni a khamtheih a haaltumte uh bel Ms. Lamneikim, Ms. Nengboi, Mr. Seiboi, Ms. Kikim, Ms. Nemboi, Mr. Likhu Hmar, Ms. Numawi, Mr. Seiboi Vaiphei, Ms. Suanching, Mr. Ngulzalal leh Ms. Niengboi te apan a matkhiat uh No. 4 a gawmkhawm a 200 gms val leh Ms. Radhika leh Mr. Jeevan te apan amat uh SP tang ahi. Hiai Khamtheih zuak mi 13te Bijang Village Authority leh Bijang Youth Club in April 7, 2007 tan a Bijang khua pawtsan ding in theisak uhi.

CDSU makaih in meeting

: High School Leaving Certificate Examination 2007 neih lai a March 28, 2007 ni a Mathematics exam hun a Don Bosco Centre a additional answer sheet kial tung toh kisai in CDSU makaih in tuni sunma dak 11:00 in CCpur Seminar Hall ah Consultative meeting neih in om hi. Hiai hun ah ITLC, CDSU Parent Body, Student-te leh anu-le-pa te uh tamtak paikhawm in Candidate tamtak in Maths exam ni a answer sheet kial adou uh toh kisai genkhawm uhi. Don Bosco Centre ‘A’a exam candidate te adia Mathematics ah Mark 10 chiat piakbeh dia phuut ding in lemsa uhi

Admission form ngaihven theih

India a medical toh kisai college minthang Vellore a Christian Medical College ah tulai in MBBS, Nursing, BOT, BPT & BSc MLT sinna diing form kihawm lellel a, a lungluut te’n http://home.cmcvellore.ac.in ah thuchian kimzaw ettheih diing hi.

Zomi Student Federation in Govt. vau

Zomi Student Federation (ZSF) in kum paita 2006 August 20, 2006 a EBCC Vengnuam Biakinn a a kaplup uh Mr. Thawngkhanlian toh kisai in tuni’n Press Hang-Out suahkhia uhi. Thusuak in a taklatna ah, Mr. Thawngkhanlian kaplup a omna Magisterial enquiry bawl dia government toh kilemna omsa kha 7 banga paita mahleh tuni tan bangmah sepsuah louh a om pen lamdangsa mahmah ahihdan taklang hi.

Thusuak in a taklatzelna ah, kintak a Magisterial enquiry bawl a, mohna nei security personnel te tung a akituahpih gawtna pe ding in noh ua, hiai bang sepsuah kin ahihkeileh thilhoihlou puang bangbang government in mohpaw ding hi’n government vau uhi.

Mizoram PTC in panlak kipan

Paite Tribe Council (Mz) HQ President P.H.Laldawnglian makaih in Paite Autonomous District Council demand boh zui taktak sawm in kipan uh a, N.E.Tangnuam, Daido leh Nausel Unit te ban ah Sialkal tangdung vehna nei uhi. Aizawl Head Post office ah leng PTC min in Post Box – 23 hongkhe ta ua, Paite khochih ah membership fee dongding in kisa lel uhi. PTC Mizoram ngetna dungzui in NEC in Ngopa-Mimbung kikal lampi puahphatna ding in Rs. 2 Crore pia ua, State PWD in nnasep pan ta uh hidan in kigen hi. Huailou in, Paite Cultural Society HQ makaih in Mimbung khua ah April 26-27 sung Cultural Meet bawlsawm in kisa ua, lemtanlouhna om kei leh Dr. R. Lalthangliana Minister in Chief Guest hihna toh uap ding hi.

IFCD Minister Office hong

SPF sorkal a TD/IFCD/Tpt Minister Pu Phungzathang Tonsing
office thak ding tuni zinglam dak 11 in Old Secretariat first floor ah honkhiakna om a, tua mun Pathian kianga latna, EBC Imphal Divisional Suptd. Rev. N.Thawndoulian in nei hi.

Hiai hun ah, Principal Secretary Pu Lawmkunga IAS, IFCD Commissioner Pu Th. Dibendra, IFCD Chief Engineer Pu Manihar leh official moimoh tuamtuam banah, Lamka apan DYCC President Pu Tongthang, CCpur AC Congress Chief Agent Pu Mangchinkhup, Election Committee Chairman Pu Thangzakhum leh mipoimoh tuamtuam in uap uhi.

Amkhanmang khe thau in kap sak

Tipaimukh Sub-Division a om Mr. Amkhanmang s/o Vumsong of Buangmun tenna in Kiginni March 31, 2007 nitak in meltheihlouh galvan tawite’n luh van tuamtuam puak mangsak uh hi’n muanhuaitak apan thutut kingah hi.
Thutut kingahdan in, hiai inn luhtute’n Mr. Amkhanmang khe kapsak ua, tu in Alipur damdawi inn ah etkol in om lel hi’n leng thutut kingah hi.