Hearing nei ding

New Lamka Vengnuam EBC Biakinn a kumpaisa August 2006 a incident toh kisai a Magisterial Inquiry bawl hilel pen lemtaanlouhna khenkhat ziak a hun bangtan hiam witnesste apan hearing neih sutzomlouh a om pen hongtung ding April 25, 2007 apan in sutzop hinawn ding hi. Tuzing Lamka Post Issue a April 24, 2007 chiang a neih ding chih pen DC/CCpur in zan Lamka Post palai ahilh hun a agenkhelh ahi. Hongtung ding April 25, 2007 chiang in SP/CCpur leh 3 Rajputana Rifle CO apan hearing neih hiding a, April 27, 2007 chiang in Witness statement penailou teng apan hearing neih hiding hi. Hiaiteng zoh in May 15, 2007 vel in Inquiry Report piaklut hiding ahihdan Mr. Sumant Singh, IAS, Dist. Magistrate/CCpur apan thutut kingah hi.

Security Meeting

DC/CCpur Mr. Sumant Singh, IAS makaih in tuni sunnung dak 1:00 in DC Chamber ah Security meeting neih in om hi. Hiai hunah Assam Rifle leh Border Security Force apan Commandant bangzah hiam leh SDPO/CCpur tel uhi. Amau District sung a security dinmun kikupna nei uhi.

PDS van mangthangsaktu mat hinailou

Food & Civil Supply nuai Public Distribution System (PDS) tungtawn a hawm ding anntang leh chini tamtak mangthangsaktu Md.Ahmed Ali tuni tan in matkhiat hinailou lai hi. Md.Ahmed Ali bel Official representative dia guan a om District Supply Office a LDC semlel ahi.Hiai anntang leh Chini mangthangte bel February, May leh July 2006 kha a CCpur District quota ahi. Hiai Kha 3 sung a BPL anntang teng gawmkhawm in 8290.20 Quintal leh AAY anntang teng gawmkhawm 4857 quintal banah Chini /sugar teng gawmkhawm 1400 quintal ahi. Hiai anntang leh chini te bel Sangaiprou FCS Godown apan in Lamka a ding in puakkhiat himahleh Lamka puaktun hilou in thelthang/mangthang hi.Hiai anntang mangthang te BPL teng a sum atuat in Rs. 48,48,108.96/- man hi a AAY teng Rs.15,10,527./- man leh chini teng Rs.18,90,000./- man pha a avek agawmkhawm in Rs.82,48,635.96/- man phazou hi. Hiai toh kisai in DC/CCpur Mr. Sumant Singh, IAS in January 20, 2007 in Lamka Police Station ah FIR lodged in Md.Ahmed Ali tungah Criminal Case khat chiamteh in om mahleh tuni tan matkhiat hinailou lai hi.