Sisa in kimukhia

Smt.Gin Dou Niang (38yrs.) w/o. Pa Vum Khen Thang, UTI Bank, Guwahati a Security semlel, 18/4/07 (nilaini) zingkal a pan a omna kitheilou tun sisa a muh khiat in om. Sawmleh giat ni zingkal a mehdi annsateh zongdia kuan tungkik nonlou ahi. Nitaklam a inn a tun kik louhtak in innkim kiang nai a omteng kisam khawm in hahtak in zong mahle uh muhzoh hilou hi. Mimang zonna ah pan nak tak a lak in om a, Police tan pha ah leng report piak man in om.

Tu in a luang Doordarshan colony kiang ah muh khiat hita a, Guwahati Medical College a postmortem zoh chiang in a tenna mun uh Shillong ah a luang puak touh hi ding hi. “Bang chi bang a si hiam?” chih thuchian hungaih lel ahi.

Meghalaya a student te sihna report luikhia

Kumlui a Meghalaya khopi nih a kikapna thupitak om toh kisai in Judicial Inquiry Commission report te kikalh bilbelk hidanin kigen a, Tura leh Williamnagar a 30th September, 2005 a thiltung te lamdang mahmah suak hi. Meghalaya Board of Secondary Education (MBOSE) thubuai toh kisai in Tura leh William Nagar ah kiphinna sousang mahmah a, huai ah police te thaukhahna ziak in mi 9 in hinna tan in, student tamtak in liamna tuak uhi. Meghalaya Chief Minister D.D.Lapang in tuni in Meghalaya Innpi ah Inquiry Commission report te luikhiakna nei in, huai ah thil lamdang tak piang hi. Williamnagar thubuai toh kisai ahihleh, (Retd) Justice D.N.Baruah makaih in Inquiry Commission phuhkhiak hi a, huai in, East Garo Hills district administration siangthou bang in puang hi.

TDC II yr Exam kipan ding

Manipur University nuai a Three Year Degree Course sinlelte lak a First year leh Third/Final Year te’n Exam neilel ua, Second Year sinlaite’n hongtung ding April 30, 2007 chiang in Examination pan ding uhi.

HAC Chairman in Lamka pha

Hill Areas Committee a Chairman Mr.Thangminlien Kipgen in tuni zing dak 10:00 vel in Lamka hongpha hi. Aman Rengkai Bible Hill leh Chiengkawn lak pha in sunnung dak 1:00 vel in Imphal ah kiksuk nawn hi.

Deptt. 4 Pay Bill passed

Treasury Officer/CCpur in tuni’n Department tuamtuam 4 te March kha loh laakna’ng Pay Bill passed sak hi. Manipur Government nuai a Department tamtak in Post Extension toh kisai hihfellouh a neihziak ua March 2007 kha loh latheilou hi uhi.

CM in Khuga Dam pha ding

Manipur Chief Minister Mr. Okram Ibobi Singh in zingchiang in Lamka hongpha in Khuga Dam kibawllel etkhiatna hong nei ding hi. CM in Saidan, Tuithapi tawn a Khuga Dam Canal pai tawn in Khuga Dam pha ding hi.

Medical Camp

People’s Health Foundation, Gangpimual leh Operation Blessing India, Hyderabad kithuah in zingchiang April 20, 2007 apan in Lamka khopi sung leh kim-le-kiang ah Medical Camp sai ding uhi.
Thutut kingah dan in, zingchiang April 20, 7am – 3pm Geljang, April 21, 7am-3pm Moirang Centre nei ding ua, April 23 & 24, zinglam dak 7 apan nitaklam dak 5 tan PHF, Gangpimual ah nei ding uh hi’n thutut kingah hi.

HSA in Government vau

Hmar Students’ Association in kum paita a Tipaimukh bial a Hmar numei 21 phaijang helpawlte’n a sualluihna uh toh kisai Government in April 17 apan kha khat sung a ahihfel keileh nuakna thupitak pan ding uh hi’n Govt. vau uhi. Thusuak in a taklatna ah, hiai toh kisai thil hoih deih kuapeuh in kithuahpihna pe chiat ding inleng ngetna thusuah bawl uhi.

Governor leh womens’ commission member te kimu ding

Manipur a tukum a patkhiak thak a om, ‘Manipur State Commission for Women’ a member ten Manipur Governor Dr. SS. Sidhu kimuhpihna April 25 nitaklam dak 3.30 in Raj Bhavan ah nei ding uhi. Hiai MSCW a Chairperson bel Dr. Jamini Devi hi a, amau pawl in April 15 – 17, 2007 sung Jiribam bial a khotuam tuam vapha in, tuamun a numei te dinmun leh ahaksatna tuamtuam te uh va enkhia in kithuah khomna hun leng vazang uhi.

Manipur a Medical college dinkhiak ding genkhom uh

Manipur University Central University dia dopkang ahih toh kiton in leh Manipur Institute of Technology leng National Institute of Technology dia dopkang ahihnung in, Lamphel a om RIMS leng NEC etkolna apat Union Ministry of Health & Family Welfare nuai a etkol dingin omta hi. Hichibang kal ah, tuni nitaklam dak 3 in CM Cabinet hall ah SPF cabinet meeting om a, hiai hun in thu tuamtuam tamtak genkhom uhi. Tuni a a genkhawm te uh bel, Fishery department a officiating a semtu te regular dia laklut ding leh contract basis dan a officiating employee lak ding, Health department nuai a State Medical College dinkhiak ding, DRDA nuai a semtu ding lak nang bawlkhiak ding ban ah, Indian Forest Service ex-cadre post nih bawl khiak ding chih ahi. IFS Ex-cadre nih dingte bel Chief Conservator of Forest, pay scale Rs 18,400 – 500 – 22,400 leh Conservator of Forest pay scale Rs 16,400 – 450 – 20,000 ahi.

NSCN IM pawl in Molvom pawtsan

NSCN IM pawl leh Assam Rifles pawl in ni 2 sung vingveng ki khingtuahna aneih nung un, tuni in NSCN IM cadre te’n Molvom khua pawtsanta uh hi’n thusuak kingah hi. Thusuak in agendan in, Molvom khua a om NSCN IM pawl Assam Rifles te’n kihemkhe ding in ngen ua, ni 2 sung kikang tuahna thupitak piang a, atawp in NSCN (I-M) cadres te’n khosung nusia in mun bit zaw ah kihemkhia uh hi’n thusuak kingah hi. IGAR (N) Maj Gen. KS Sethi in Medziphema khosung vehna va nei in, khosung Upa khenkhat toh kihouna nei in, thil omdan saikhawm uhi. Ni tamlou paisa in Molvom leh Bungsang khua ah NSCN-IM leh NSCN-K cadre te naktak in kikaptuah ua, huai ah sergeant major 2 in sihna tuak uhi. Zunheboto district ah leng tuni mahmah in buaina ana om kik nawn a, himahleh, amun amual bangmah thuchian zak hilou hi. Nagaland gamsung ah ni 4 lel paisa sung in NSCN Faction nih apan mi 11 in hinna tan uhi.

Postal Deptt in Order khauhtak bawl

All Manipur Anti-Drug Association (AMADA) pawl in zan a Post and Telegrah Office gari apan Gutkha product chituamtuam Raja, Zarda, Talab leh adangdang tamkhop amat ziak un, hiai in Postal department te naktakin suthang pai a, inquiry commission khat dinkhe hial uh hi’n kigen hi. Imphal Post Office a Public Relation Officer (PRO), RK Maipaksana in tuni a agendan in, hiai thubuai suitu ding in Superintendent, A Kesav Rao sehkhiak hi a, hiai thu suichian zoh ahih chiang in, Agartala postal service ah khak hidia, a kihel staff peuhmah tung ah Dan bang in action lak hiding in PRO in gen hi. Zan in Postal Department te gari ah Tobacco product chituamtuam Khaini leh Zarda tamtak Koirengei bazar ah AMADA volunteer te’n mankhia ua, hiai pen Postal Department adia zahlakna liantak ahi chi uhi. AMADA pawl in ahihleh, huai Tobacco te neitu Nandajit Saha (28) of Bihar mankhia ngal ua, amah ahihleh, Masjid Road Imphal ah khosa hi a, amah toh kizom Kangpokpi post office Master leh Imphal Head Post Office (HPO) a staff nih leng mankhia uh hi’n kigen hi. Post Office te gari Tata DI bearing no-MN-01-6700 in ahihleh, AMADA pawl thilkham Tobacco Product chi tuamtuam Rs. 4,40,520 val man ve pual hi a, thuguk sangtak a ngah dungzui ua amatkhiak uh hi’n leng thusuak in gen hi. Kangpokpi Post Master ahihleh, Md. Abdul Kalam (42) hi a, Head Post Office a sem staff nihte ahihleh, Salam Open (45), peon leh M. Nabachandra Singh, Postal vehicle driver te hidanin thusuak in gen hi.

NSCN IM makai khat thah hinawn

Zan nitaklam in NSCN IM nuai a “sectional officer” khat Mokokchung khopi sung ah meltheih louh galvan tawi pawlkhat in kaplum nawn uh hidanin thusuak kingah hi. Thusuak in agendan in, thah a om NSCN IM makai leh S.O. hihna lenglel Moatoshi (34) S/o (Late) Mongjendangba of Kinunger village, Mokokchung hidanin gen uhi. Mokokchung bial sung a Longjang Village a T. Akang Inn lum a Moatoshi ihmu lai hidanin kigen a, meltheihlouh pasal 6 vel valut in Maotoshi pikhia in, maituam ngal ua, a khonung in kaplupsa in T Akang sungkuante’n va mukhia uh hi’n kigen hi. NSCN (K) UT-I supervisor Akato Chopi in agendan in, Moatoshi Nam melma ahih ziak a thah a om hidanin gen hi.

Kho mipi’n IM pawl douding in kisa

Seluophe khua ah zan in NSCN(I-M) pawl in minautang khat soisa lum ua, hiai thu toh kisai in, Seluophe khomipite sousang mahmah uh hi’n thusuak kingah hi. Zan in Seluophe kho mite kitom zak in, NSCN IM Council Headquarter Camp Hebron lutna lampi hun sawmkuamtak khak tan in, lampi lai ah misi koih uh hi’n kigen hi. Mipite kikou zaak in, NSCN (I-M) in naupang Vilasielie Sanchu (20) of Razhaphe village that tute gawtna pia uhen, chi in kikou ua, thau tawi leh tawilou tanpha kibei ding in chouna neipawl leng om man hi’n kigen hi. Seluophe Village Council leh Naga NGO tuamtuam a makai tamtak in si luang lampi lai ah tutpih maimah in kihou lemna om ma teng siluang ka lakhe kei ding uh chi in vau uhi.

April 15 ni in Vilasielie leh alawmte 3 kholai pawt mikhat toh kisu buaikha ua, kilemna om khit nung in, NSCN IM member 4 in Seluophe village apan Sanchu, Menguzetuo, Pelesavi leh Gautam te pikhia in, Bade camp ah tonpih in kem uh hidanin SVC in ngohna bawl hi. Gautam ahihleh, April 16 in khahkhiak in om ngal a, alawmte Menguzetuo (20) of Selouphe village leh Pelesavi (19) of Razhaphe village te gawt ahih nung un, Rs.2,000 liausak in om ua, tu’n damdawi inn ah etkol in om lel hidanin thusuak in gen hi. Zan in Sanchu luang lampi kiang ah sisa in muhkhiak in om a, hiai toh kisai in Kho mipite’n NSCN IM ‘major’ Meitei kichi pekhe ding in Ato Kilonser kiangah ngetna bawl uhi. Tutan in buaina in venlam sang in siatlam nawtzaw lai a, kho mipite’n a poimoh leh IM pawl naktak a douding in leng NSCN IM Council Headquarters ah vauna pelut uhi.