Hearing sunzom ding

New Lamka, EBCC, Vengnuam Biakinn a kum paisa August 2006 a incident toh kisai a Magisterial Inquiry bawl hilel pen lemtaanlouhna khenkhat ziak a hun bangtan hiam witness-te apan hearing neih sutzomlouh a om pen hongtung ding April 24, 2007 apan in sutzop hinawn ding hi. Hongtung ding April 24, 2007 chiang in Witness statement penailou teng apan hearing neih hiding a, April 25, 2007 chiang in Police leh 3 Rajputana Rifle CO apan in hearing neih hinawn ding hi. Hiai teng zoh in Inquiry Report piaklut hiding ahihdan Mr. Sumant Singh, IAS, Dist. Magistrate/CCpur apan thutut kingah hi.

Civic Action Program –cum- Medical camp om

Border Security Force (BSF) nuai a Assam-Meghalaya Frontier Inspector General Shri PK Mishra in tuni in Lamka hongpha in, huai ah Mata Lambulane a STC/BSF in a sai Civic Action Program –cum- Medical camp honkhiakna nei hi.
Tuni a kikhopna hun ah BSF apan Shri SK Sood DIG/CD MDT STC, BSF CCpur, Shri Ajai Commanding Officer 100 Bn BSF, Shri Virendra Singh Officiating Commandant 41 Bn BSF, Shri RK Yadav leh Official tamtak in hon zui uhi.

Shri PK Mishra ahihleh, Shillong khopi apan hong kipan hi a, aman BSF Jammu and Kashmir ah Commanding Officer hihna ana lenkha ngei in, Black cat (SPG) ah leng hun sawtkuamtak Prime Minister vengbittu in ana pangkha hi.

Hiai Medical Camp ah Mata Lambulane kho mipite banah kho kim-kho kiang apan mitamtak paikhawm in, Lambulane Community Hall ah program neih in om hi. Huai hun ah, STC BSF CCpur in kho mipite leh huai area a Hausate kiang ah Blanket hoih mahmah ngen 86 hawmkhia ua, Mata Lambulane Government Jr. High School naupangte a ding in Uniform Set 84 leng hawmkhiakna nei uhi. Government School Headmaster K G Tongthang in Chief Guest PK Mishra kiang ah memorandum khat pelut in, 1965 a kibawl Government school building sezak gawp bawlthak sak dingin ngen a, Lambulane Hausapu Letkhohao Haokip in Chief Guest pa Nampuan silhsakna nei a, Youth Club te’n play ground kekletsak ding in ngetna pia uhi.

NSCN K Sgt Major kaplup in om

NSCN helpawl nihte kal a kikaptuahna in mailam sawnzel in dakkal 48 sung in NSCN K pawl mi 7 in sihna tuak uhi. Zan in kikaptuahna thupitak Zunheboto mun ah om a, hung nung tuni mah in National High way 39 ah kikaptuahna om nawn hi. Thusuak kingah dan in, Kohima leh Dimapur kal a kho om Medziphema mun ah pawl nih te naktak in kikaptuah ua, huai ah NSCN-K “Sergeant Major” khat kaplup a aom ban ah, 1 kapliam in om a, minautang nih leng liamkha uh hi’n kigen hi. Tu zingkal dak 8 in NSCN-IM member 65 khe a pai in, galvan hoih taktak toh Medziphema kho kiang geih a om Serima mun a NSCN Khaplang te camp va bukap ua, huai ah dakkal 2 vel thau ging hi’n gen uhi. Thusuak in agendan in, civil mi liamna tuakte Kuki te tuak hi ua, Civil Hospital, Dimapur kintak in zotpih in om chi uhi. NSCN K cadre sihna tuak ahihleh, “sergeant major” Kihoto Chophy S/o Kivito Chophy of Kuhoboto hidan in kigen hi. Tuabang kal ah, tuni zinglam dak 10:30 in Kohima khopi sung a om Jail Colony ah helpawl nih kikap tuah ua, huai ah mi 3 in liamna tuak hidanin kigen a, himahleh,a pawl min uh puankhiak omlou hi.

Doctor sinlel khat tui ah kelum

Regional Institute of Medical Sciences, Imphal a MBBS Final Year sinlel khat tuni in Loktak lake ah kelum hi. Thusuak kingah dan in, Arunachal Pradesh mi Shupindra (24) in Regional Institute of Medical Sciences (RIMS) ah Doctor sinlel in, Loktak lake ah tuni in picnic ding in hoh uhi. Shupindra (24) ahihleh, RIMS hostel no.1. ah om a, lehkha siamthei tak leh thumang tak mi hi in kigen a, Loktak lake ah alawmte nih toh long neu tung ah tuang in vak kual uh a, bangchi bang chet a kia hiam chih bel puankhiak hilou hi. Hiai thu zaak ahih in, RIMS compound sung naktak in su thawmhau a, Medical officer tamtak leh RIMS superintendent tel in alawm leh vualte’n Loktak lam kidelh huan uhi.

Youth Rally ah tel ding

Nehru Yuva Kendra sai na in hongtung ding May 3, 2007 apat in Meerut leh Delhi kikal ah Youth Rally tupitak neih hiding a, hiai hun ah India gamsung a NYK tuamtuam apan in tuailai 30,000 vel paikhawm in lamzui ding uhi. Hiai hun a telding in NYK/CCpur apan in palai 25 kuan ding uhi